O mozo David M.C., acusado de matar a un profesor xubilado (a quen golpeou na cabeza cunha bóla de mármore e logo lle asestou 21 coiteladas) no seu piso da rúa Areal de Vigo, recoñecerá ser autor do crime, que a Fiscalía cualificou como homicidio. Así o avanzou a defensa do procesado, no primeiro día do xuízo por estes feitos, na sección quinta da Audiencia Provincial de Pontevedra, con sede na cidade olívica. Nesta primeira xornada constituíuse o tribunal de xurado e as partes presentaron as súas alegacións iniciais.

O Fiscal relatou, nunha longa exposición, os feitos ocorridos entre o 27 de decembro de 2021 e o 4 de xaneiro de 2022, data na que o acusado foi detido nun control de tráfico da Garda Civil, cando viaxaba nun coche adquirido co diñeiro da vítima, Benito T.S., a quen subtraeu os seus cartos e outra documentación. Para o representante do ministerio público, hai indicios sólidos de que David M.C. estivo a cear a noite do 27 de decembro coa vítima en casa deste e, horas despois, comezaron os movementos de diñeiro da conta do falecido.

Tamén sinalou que, na noite do 28 ao 29 de decembro, o acusado matou a Benito T.S. golpeándolle cunha bóla de mármore decorativa na cabeza. Unha vez no chan, atacouno cun coitelo de cociña, cortándolle o pescozo e inflixíndolle outros cortes e punzadas no pescozo, a cara, a cabeza ou o tórax; de feito, o propio fiscal alertou ao tribunal do xurado de que as imaxes do escenario e da vítima incluídas no sumario son “estremecedoras”.

PROBAS DE CARGO

As probas, lembrou, son determinantes: o ADN de vítima e acusado estaba no mango do coitelo, e tamén nunhas zapatillas e outras pezas que David M.C. deixara nun hotel vigués. Ademais, as pegadas de calzado localizadas no lugar do crime coinciden con esas zapatillas, e tamén había pegadas na bóla decorativa que usou para golpear a Benito. Entre o 27 de decembro e o 4 de xaneiro, o acusado realizou diversos gastos con cargo á conta da vítima, entre eles a compra de dous vehículos de segunda man, a conta do hotel onde se aloxou, combustible, tabaco, copas, e outros conceptos, ata un total de máis de 17.700 euros.

O 4 de xaneiro de 2022, o acusado foi interceptado nun control de tráfico da Garda Civil, na AP-53, á altura de Silleda. Os axentes sospeitaron do mozo cando viron que levaba consigo documentación doutra persoa. Así, informaron á Policía Nacional e á Policía Local de Vigo que, en contacto con familiares da vítima, acudiron ao seu domicilio da rúa Areal, e atoparon o seu cadáver. O Fiscal considera que estes feitos son constitutivos dun delito de homicidio e dun delito continuado de estafa, en concurso cun delito leve de furto. “O acusado non só recoñeceu os feitos, senón que indemnizou aos irmáns da vítima”, lembrou. Así, tras considerar a atenuante de reparación do dano, pide que sexa condenado a un total de 11 anos e medio de prisión.

ASASINATO CON ENSAÑAMENTO

Pola súa banda, as acusacións particulares personadas (en representación dos irmáns da vítima) sinalaron tamén que as probas sinalan sen dúbida ao acusado. “O que pasou é evidente e o móbil era económico”, apuntou un dos avogados, que engadiu que, en apenas uns días, David M.C. “puíuse máis de 15.000 euros en dous coches e en parvadas”.

Os irmáns da vítima foron indemnizados en algo máis de 38.000 euros en total, e renunciaron a reclamar a responsabilidade civil. Con todo, estas acusacións cualificaron os feitos como un asasinato con ensañamento e, alternativamente, como homicidio, ademais dun delito continuado de estafa, e piden un total de 18 anos de prisión.

DEFENSA

Mentres, o avogado da defensa confirmou que o acusado recoñece os feitos e confórmase coa descrición dos mesmos realizada pola Fiscalía, así como coa pena solicitada. “Mañá, cando lle toque declarar, volverao a recoñecer, previsiblemente”, explicou o letrado defensor. Esa parte censurou que, recoñecendo os feitos, a Fiscalía fixo unha exposición “excesiva”, “relatando todo e dando voltas”. De feito, subliñou que “nin sequera é necesario practicar toda a proba”. Tras a xornada deste luns, o xuízo continuará este martes coa declaración do acusado e a dalgunhas testemuñas. Con todo, a previsión é que a partir dese momento se axilice o desenvolvemento do xuízo porque previsiblemente as partes renunciarán a parte da proba.