A Policía Local de Vigo advertiu este luns aos usuarios da praia de Samil sobre a prohibición do uso de cortavientos e outros obxectos para ‘parcelar’ o areal, ordenando a súa retirada, e lembrando que saltar esta prohibición pode carrexar multas de entre 751 e 1.500 euros.
Así o confirmaron fontes do Concello olívico, despois de que se fixeran virais imaxes da emblemática praia viguesa cheas deste tipo de dispositivos, e das protestas pola ‘privatización’ de parcelas na area.
As mesmas fontes sinalaron que se optou por realizar un “operativo de información” por parte de axentes do 092, “ante a proliferación repentina” destes cortavientos.
De feito, o alcalde, Abel Caballero, nunha intervención no programa Mañaneros de TVE, matizou que esta situación “non é un costume da praia” e que este ano “é a primeira vez” que se están vendo cortavientos neste número. “Este fenómeno está circunscrito aquí (a Samil)”, subliñou, antes de lembrar que “a normativa o prohibe” e trasladar a súa confianza en que o problema estará liquidado “en tres ou catro días”.
Segundo apuntaron fontes municipais, coa colaboración cidadá, na mañá deste luns a praia de Samil “quedou liberada de cortavientos”, e o alcalde reiterou que, tras esta primeira intervención informativa por parte da Policía Local, “a partir de mañá haberá multas” para quen incumpran a ordenanza, que data de 2021.
