Para o BNG, e o seu candidato ás próximas eleccións muncipais, Xabier P. Igrexas, destinar 800.000 euros ao alumeado de Nadal en Vigo máis outros 760.000 a figuras decorativas é “indecente, nun contexto no que millares de familias viguesas atravesan situacións de pobreza”.

Pérez Igrexas cargou contra a “total falla de sentido da realidade” do actual Goberno municipal, lembrando que na cidade, segundo datos oficiais, hai 65.000 de persoas en risco de pobreza.

“Con máis de 22 mil persoas no desemprego, na nosa cidade resulta intolerábel que o Concello de Vigo dedique máis recursos a ornamentos que a políticas de emprego”, denunciaron.

Neste sentido, o candidato nacionalista diferenciu que mentres o Plan Municipal de Emprego (PME), que lembrou foi posto en marcha hai varios anos a iniciativa do BNG, ten unha partida de 1 millón 200 mil euros, o Goberno municipal vai dedicar máis de 1,5 millóns a “adornos”, un 25% máis.

Gastos aos que ademais hai que engadir o custe da factura eléctrica “que pagaremos todos os vigueses e todas as viguesas, non Abel Caballero”, nunha cidade na que hai moitos fogares en situación de pobreza enerxética.

Xa demandárase no debate dos orzamentos municipais, a través dunha emenda, que se aumentara até os 3 millóns de euros a partida do PME, proposta que foi rexeitada pola maioría absoluta do PSOE.

“Hai un ano o PSOE negouse a incrementar os recursos destinados ao principal problema social da cidade, que é o desemprego e precariedade, pero non ten reparos nin vergoña en dilapidar recursos públicos en frivolidades”, cargou Pérez Igrexas.