A Consellería de Infraestruturas e Mobilidade, a través da Axencia Galega de Infraestruturas, publicou este venres no Diario Oficial de Galicia (DOG) a aprobación do proxecto de construción das obras da segunda fase do proxecto de humanización da Avenida de Galicia de Vigo.
Tal como informou a Xunta, esta acción completará a remodelación do viario para os veciños da parroquia viguesa de Teis e suporá un investimento de 4,1 millóns de euros.
A súa publicación no DOG recolle o acordo aprobado na reunión do Consello da Xunta do pasado 23 de febreiro, no que tamén foi aprobado o trámite de información publica desta nova intervención, que ten como obxectivo fomentar a mobilidade sustentable na zona.
O departamento de Infraestruturas prevé licitar as obras este mes para que dean comezo os traballos en outubro. A actuación ten un prazo de execución de 14 meses.
