O BNG esixiu á Xunta unha “rectificación” das súas políticas de “recorte e privatización”, que levaron á área sanitaria de Vigo a un “desastre inducido” e a unha “situación límite”, especialmente á Atención Primaria, e acusou ao goberno galego de mentir cando di que “non se pode facer máis”.
Así o trasladaron deputados nacionalistas e o concelleiro vigués Xabier Pérez Igrexas, tras manter un encontro con membros da Xunta de Persoal do Chuvi, aos que trasladaron o seu “apoio”.
A portavoz de Sanidade do BNG no Parlamento galego, Montse Prado, advertiu de que é “rotundamente falso” o que afirma o goberno autonómico, sobre que “non se pode facer máis” para reforzar a sanidade pública. Nese sentido, denunciou que, tras máis de ano e medio de pandemia, “non hai practicamente ningún centro de saúde en Galicia que estea a funcionar con normalidade”.
Nese sentido, afirmou que a situación actual da Atención Primaria é resultado de “decisións políticas que só perseguen dinamitar a sanidade pública para promover os seguros privados”. Nese sentido, lembrou que o BNG leva meses facendo propostas “concretas e factibles” para mellorar a situación, “que só esixen vontade política”, como o plan de choque dotado con 200 millóns de euros para a Primaria.
REFORZO DE PERSOAL
A deputada incidiu tamén na proposta de incorporar novos profesionais de áreas como psicoloxía clínica, logopedia e terapia ocupacional, ou ampliar as carteiras de servizos para que enfermeiras, matronas ou fisioterapeutas poidan desenvolver máis funcións con autonomía.
Para Prado, o reforzo de persoal debe estenderse tamén ao resto de categorías, como persoal de servizos xerais ou administrativos, para paliar a saturación provocada polos procesos derivados do Covid. Ademais, advertiu de que a volta á atención presencial require de reforzos materiais e humanos.
Mentres, o concelleiro do BNG en Vigo, Xabier Pérez Igrexas, denunciou que os centros de saúde están a funcionar “coa metade do persoal necesario”, o que provoca listas de espera de ata 20 días para conseguir unha cita, así como unha diminución na calidade asistencial.
Así mesmo, tras a reunión coa Xunta de Persoal, o edil nacionalista confirmou o apoio da súa formación á manifestación convocada polos representantes dos traballadores para esixir solucións á situación da primaria, e proclamaron que “non chega con queixarse” senón que “hai que mobilizarse con toda a firmeza para esixir o dereito a unha sanidade pública, gratuíta e de calidade para todos”.
