A Garda Civil detivo a tres persoas tras desactivar dous puntos de venda de droga en dúas casas do municipio pontevedrés da Guarda, onde se incautaron diversas cantidades de estupefacientes.
Tal como informou a Benemérita nun comunicado, as investigacións iniciáronse o pasado mes de marzo, cando se tivo coñecemento de que esas dúas casas que se atopaban nunha céntrica rúa da localidade podíanse estar a utilizar como punto de distribución e venda de droga ao ‘menudeo’.
Por mor das investigacións realizadas confirmáronse as sospeitas, interceptando a varios consumidores habituais inmediatamente despois de comprar a droga nestas vivendas. O operativo culminou coa entrada e rexistro destes dous domicilios e a detención dos seus moradores, que resultaron ser unha parella de 48 e 45 anos, así como outro home de 54 anos de idade, todos eles cun amplo historial delituoso relacionado cos estupefacientes.
Nos rexistros dos inmobles que viñan sendo empregados polos detidos para a venda de droga incautáronse pequenas cantidades de heroína, cocaína, haxix ou marihuana, algunhas delas dispostas en doses para a súa venda. Tamén se interviñeron 14 pastillas de metadona, diñeiro en efectivo, catro básculas de precisión e cadernos con anotacións e rexistros das vendas.
