O xurado do premio ‘Nortear‘, organizado no marco da Eurorrexión Galicia-Norte de Portugal, nomeou á nova escritora lusa Célia Fraga como vencedora da sexta edición pola súa obra ‘Ganapos’.

Segundo informa a Xunta, trátase dun certame organizado en colaboración coa Agrupación Europea de Cooperación Territorial Galicia-Norte de Portugal (AECT) e que ten o obxectivo de “recoñecer as obras literarias orixinais de ambos os lados da fronteira” á vez que se incentiva a produción “entre a mocidade”.

En concreto, o premio consiste en 3.000 euros en metálico e a publicación de 500 exemplares en edición bilingüe, tanto en galego como en portugués, posto que o concurso ‘Nortear’ busca o fomento da “circulación e distribución de obras” entre a Eurorrexión.

O xurado escolleu ‘Ganapos’ de Célia Fraga, procedente de Vila Nova de Gaia, entre as 28 obras que se presentaron a esta sexta edición –nove en galego e castelán e 19 en portugués– por contar “cunha escrita elegante, madura e coherente, e cunha forte utilización da estética”, explica a Xunta.

Nas edicións precedentes do concurso participaron sobre 230 publicacións de mozas entre 16 e 36 anos. Como vencedora da sexta edición, Célia Fraga súmase a unha lista conformada polas galegas Lara Dopazo, Cecilia Santomé e Sabela Varela e polos portugueses Rui Cerqueira Coelho e Sara Brandão.