As doazóns de sangue realizadas na planta viguesa do grupo Stellantis (antes PSA) desde 1995 alcanzaron as 69.472 tras a última campaña, levada a cabo os días 19, 20, 21 e 28 de outubro.
A que foi a cuarta campaña deste ano nas instalacións contou coa participación de 734 traballadores, o que permitiu elevar a 648 as doazóns, segundo detallou a Axencia Galega de Doazón de Órganos e Sangue (ADOS).
No que vai de ano, realizáronse catro campañas no centro de Vigo do Grupo Stellantis, o que supuxo acumular 2.862 doazóns de sangue anuais. Así, a axencia destacou a contribución desta planta.
O centro de Vigo acolle campañas promovidas pola Consellería de Sanidade desde hai 26 anos, o que permitiu que esta sexa a empresa española que máis doazóns acumula. Ademais, ADOS concretou que o resultado da última campaña permitirá realizar 310 intervencións cirúrxicas ou trasfundir plaquetas case 120 enfermos oncolóxicos.
