A Audiencia de Pontevedra estimou un recurso presentado por un local de lecer de Vigo e revogou a sentenza que o condenou a indemnizar con 6.000 euros a un cliente por intromisión na súa intimidade, tras difundir un vídeo no que se lle podía ver en “actitude cariñosa” cunha muller que non era a súa parella. Inicialmente, a sección Civil do Tribunal de Instancia de Vigo condenara á discoteca, pero a representación do establecemento presentou recurso, que foi acollido pola Audiencia Provincial.

Así, o tribunal provincial sinala que a imaxe do cliente, que dura uns 4 segundos nun vídeo de 13 segundos, é “meramente accesoria”, e que o feito de que fose editado para introducir efectos de ‘corazóns’, non implica que a discoteca pretendese atendar contra o seu dereito á imaxe e a intimidade. Na súa resolución, a Audiencia expón que o obxectivo do vídeo, que foi difundido na conta de Instagram do local, era “dar a coñecer o ambiente” do pub, mostrando unha visión xeral, e sen deterse en ningunha persoa concreta.