A Xunta de Galicia, a Autoridade Portuaria de Vigo e o Consorcio da Zona Franca de Vigo expuxeron a constitución dunha entidade para xestionar os sistemas xerais da Plataforma Loxística de Salvaterra-As Neves (Plisan), coa colaboración destes dous concellos.
Así, os representantes destas institucións mantiveron este luns unha reunión na que explicaron aos rexedores municipais a forma de colaboración prevista e entregáronlles unha proposta de acordo para que a estuden. As partes volverán reunirse o 23 de setembro.
Esa proposta de acordo prevé que, unha vez terminadas as obras de urbanización das fases 1 e 2 da Plisan, cederase aos municipios os viarios, zonas verdes e espazos libres executados. Mentres, os equipamentos como a depuradora e a potabilizadora seguirán sendo xestionadas temporalmente polos promotores da Plisan.
Con respecto á conservación e mantemento destas infraestruturas, Xunta, Porto e Zona Franca constituirán unha entidade de xestión dos servizos xerais. Mentres non se constitúa, esas tres institucións asumirán o mantemento.
Na reunión, o director xeral do IGVS, Heriberto García, explicou que a Plisan incluíuse na modificación do plan sectorial de ordenación de áreas empresariais de Galicia, que se atopa en tramitación, coa que se volven a incluír máis dun millón de metros cadrados ao ámbito da Plataforma Loxística Industrial.
