A plataforma veciñal Barreiro Ladra denunciou a realización de rozas nun humidal de Vigo, que deixaron varios puntos da zona sen “cobertura vexetal”, segundo critica a organización. A plataforma deu aviso á Policía Local tanto o martes como este venres, solicitando que se desprazase unha patrulla ata o lugar para comprobar sobre o terreo se os operarios contan con autorización do Concello para realizar estes traballos.
“Tanto se estes traballos carecen de autorización como se foron encargados ou consentidos polo Concello, a responsabilidade é súa”, lamentou a plataforma veciñal. Os ecoloxistas subliñaron que o humidal é un recinto valado e pechado ao público, polo que cuestionan a necesidade das intervencións realizadas. “Non hai persoas nin vehículos que circulen baixo esas árbores, nin pólas que dificulten o paso ou ameacen a ninguén”, insistiron.
