Silvia Iglesias e Sara Carrasco, integrantes da cooperativa 13 grados, son as promotoras de Subgo, un proxecto de educación ambiental que pretende achegar ao público a riqueza submarina das costas galegas mediante realidade aumentada.

A iniciativa incluirá fotografías, ilustracións, actividades interactivas e a experiencia inmersiva en 360º polas paisaxes submarinas da ría de Vigo. “O obxectivo é que os visitantes descubran o medio mariño que os rodean e o seu gran valor patrimonial dunha forma diferente, concienciándoos sobre a súa conservación e sostibilidade”, sinala Iglesias.

Os fondos pouco profundos da ría de Vigo, as súas plataformas de cultivo ou os bosques de algas serán os grandes protagonistas destas imaxes, aínda que o propósito é que a inicativa poida expandirse a máis localizacións, tanto a nivel galego como a outras rexións.

Subgo está en fase de desenvolvemento na actualidade. A previsión é que o proxecto se lance ao mercado nun prazo máximo dun ano e que poida expoñerse en centros educativos, de investigación e divulgación científica, muses ou centros de interpretación.