O Partido Popular e o BNG de Vigo coincidiron este mércores en demandar unha modificación orzamentaria moito máis ambiciosa que a presentada polo goberno de Abel Caballero. Ante a existencia de máis de 215 millóns de euros acumulados nas arcas municipais, os grupos da oposición rexistraron diversas iniciativas para liberar uns 60 millóns de euros de remanentes, co obxectivo de destinalos a plans de vivenda e políticas sociais para atender as necesidades reais dos vigueses.
A presidenta local dos ‘populares’, Luisa Sánchez, sinalou que o grupo municipal presentou cinco emendas para incrementar en 64,5 millóns de euros a modificación orzamentaria de 10,9 millóns anunciada polo goberno local. Desa contía, 60 millóns irían destinados a un programa municipal de vivenda que responda ás necesidades reais da cidadanía. Sánchez reivindicou que o Concello de Vigo ten capacidade para afrontar este investimento, que supón un terzo dos 215 millóns acumulados, froito dunha xestión onde se recada pero non se gasta, alimentando o ego do alcalde en lugar de devolver o diñeiro aos veciños.
Na mesma liña, o portavoz municipal do BNG, Xabier Pérez Igrexas, reclamou este mércores moita máis ambición na utilización dos remanentes e anunciou o rexistro de ata 172 emendas para mobilizar case 61 millóns de euros adicionais. Igrexas criticou que o goberno local pretenda usar só 11 millóns para investimentos xa previstos, cualificando a xestión actual de propaganda con promesas incumpridas. Entre as propostas do Bloque destaca o reforzo das políticas sociais, duplicando as axudas para persoas empobrecidas, e a dotación de 20 millóns de euros adicionais para a futura Empresa Municipal de Vivenda, buscando que sexa un instrumento útil e non un simple logotipo ante a emerxencia habitacional.
