A banda irlandesa The Corrs actuará no auditorio de Castrelos de Vigo o próximo 11 de agosto, dentro da programación das festas da cidade organizada polo Concello. O anuncio foi realizado polo alcalde, Abel Caballero, a través dun audio remitido aos medios de comunicación, onde destacou a traxectoria do grupo formado por catro irmáns.
Dende o Concello resaltaron que The Corrs é un referente internacional da música pop ao combinar melodías da tradición irlandesa con influencias de pop e rock. Dende o seu debut en 1995, a banda vendeu máis de 40 millóns de discos en todo o mundo. Entre os seus maiores éxitos atópase o tema ‘Breathless’, que acadou o número un en 17 países. O alcalde, Abel Caballero, cualificou a vindeira actuación como un concerto “marabilloso”.
