InicioCulturaAlberte Valverde ofrece este xoves unha charla sobre a poesía galega na...

Alberte Valverde ofrece este xoves unha charla sobre a poesía galega na transición

PUBLICADO O

A I Cátedra Internacional José Saramago organizou para esta semana unha conferencia do crítico literario, profesor de lingua e literatura galegas e especialista en poesía galega vanguardista Alberte Valverde sobre poesía galega na transición.

A cita será este xoves día 28 na libraría Andel e nela o autor tratará de axudar ás persoas asistentes a coñecer mellor “unha etapa histórica decisiva no devir do campo literario galego a partir dunha data concreta, 1979, e dun xénero, o poético”.

Pasados xa corenta anos do inicio da Transición española, desde a dirección da cátedra consideran que este é o momento de establecer unha ollada crítica sobre esta época desde un punto de vista historiográfico.

O motivo da escolla da poesía da transición como eixe central da conferencia radica na súa importancia, tanto política, debido á finalización dunha década convulsa, ao inicio da España Democrática e da Xunta preautonómica a finais do 1978, como cultural, coa incorporación do idioma galego ao ensino non universitario, a aparición de novas editoriais ou a dedicatoria das Letras Galegas a un escritor de vangarda como Manuel Antonio.

Segundo explica o autor, a conferencia focalizará a súa atención no xénero poético por mor de manexar durante varias décadas un capital simbólico singular, o discurso de resistencia cultural.

“A poesía socialrealista ocupa o canon dos anos setenta ao establecer un elo de unión entre o campo literario e outros paralelos como son o musical, o plástico e o político”, explica Valverde, ao tempo que fai fincapé en que a configuración de habitus como o de “poeta comprometido” revísase nesta altura para trocalo cara a unha nova dinámica que se podería definir xa na década de 1980 como de produción ou escrita “institucional”.

“É desta maneira como analizamos a produción deste ano para ver como se van asentando novos repertorios, axentes e habitus no campo literario galego da Transición”, recalca.

ÚLTIMAS

Tres atracadores levaron uns 300.000 euros a punta de pistola do Caixabank de Gran Vía

A Policía Nacional revisa imaxes gravadas polas cámaras e toma declaracións a testemuñas e empregados para atopar...

A remodelación do Museo Massó de Bueu rematará en 2024

O conselleiro de Cultura, Educación, FP e Universidades, Román Rodríguez, visitou este venres o Museo Massó...

O grupo municipal do PP denuncia que o Concello só dea “3 días” aos grupos para analizar a PXOM tras a súa tramitación “opaca”

O PP de Vigo reprochou este xoves que o Concello olívico só dea "tres días hábiles" aos grupos...

Traballadores de Vitrasa saen de novo á rúa para solicitar que a empresa e o goberno local acheguen unha solución

Decenas de traballadores de Vitrasa, concesionaria municipal do transporte urbano da cidade de Vigo,...