O Valedor do Cidadán do Concello de Vigo, Luís Espada, xunto ao director xerente de HC San Rafael, José Antonio Atienza, inaugurou este venres pola mañá en Vigo o tradicional Belén do Nadal que o Fogar e Clínica San Rafael monta na cidade desde hai máis de 70 anos.

A superficie aproximada que ocupa este Belén, instalado nun aula da área Educativa do Centro, supera os 40 metros cadrados e conta con máis de 100 figuras que representan as escenas típicas deste tipo de recreacións.

Tal e como explicou José Antonio Atienza, “esta representación é posible grazas ao intenso traballo desenvolto polo persoal e os usuarios de todos os talleres da área Ocupacional que levan meses traballando na súa preparación, deseñando os diferentes escenarios, seleccionando e adecuando as figuras e preparando toda a parte técnica que permite que o noso Belén sexa cada ano diferente e único”.

Ademais do nacemento e a adoración dos Reis Meigos, a montaxe inclúe escenas cotiás, representacións de diferentes oficios, paisaxes de ríos, montañas e desertos, pontes, camiños e vivendas.

Unha das principais características deste Belén é que nunca é igual e cada ano o equipo responsable deste traballo esfórzase por innovar e incluír novidades técnicas e artísticas que o fagan máis atractivo.

En concreto, este ano renovouse por completo un dos laterais da montaxe e incluíronse, entre outros detalles, un novo poboado e un muíño que se move coa auga. Todos os profesionais e usuarios dos talleres ocupacionais traballan no desenvolvemento desta iniciativa.

As casas e os poboados foron elaborados por usuarios dos talleres de Carpintería e Iniciación á Madeira; os decorados contan coa colaboración dos usuarios do taller de Manipulados; e o traballo do taller de Coiro pódese apreciar en detalles como as palmeiras.

O director xerente de HC San Rafael destacou que “se trata dun Belén respectuoso co medio ambiente dado que na súa elaboración empréganse importantes cantidades de material reciclado e búscanse alternativas sustentables a elementos como o brión, cuxa utilización foi prohibida hai algúns anos”.

Desde as súas orixes, este Belén recibiu a miles de persoas e visitalo converteuse nunha tradición que pasou de pais a fillos. A entrada é gratuíta e permanecerá aberto ao público do 21 de decembro ao 6 de xaneiro, de 11:00 horas a 13:30 horas e de 16:30 h. a 20:30 horas.

Nunha sala contigua ao Belén tamén se poderá visitar un mercadiño no que se mostran e poñen á venda os traballos realizados polos usuarios dos talleres da área Ocupacional durante todo o ano. Neste espazo os visitantes poderán atopar diversos artigos do Nadal así como manualidades de diferente tipoloxía.