Os mozos vigueses falaron: o acoso escolar e os erros no sistema educativo, ao que cualifican de mal estruturado e deficiente en temas como as drogas, son as dúas problemáticas que máis lles preocupan na actualidade.

A selección fixérona máis dun centenar de estudantes de escolas públicas, privadas e concertadas de Vigo, no marco do Programa Scholas Ciudadanía que leva a cabo por estes días na cidade olívica.

Desde hoxe luns e ata o venres 5 de outubro reuniranse para analizalas en detalle e achar as súas posibles solucións. Acompañados por unha vintena de docentes das escolas participantes e voluntarios da Escola de Maxisterio do CEU, entre outros, os mozos e mozas entrarán de cheo nesta “semana de inmersión” mediante ferramentas pedagóxicas coordinadas polo equipo internacional da Fundación Scholas Occurrentes, que lles axudarán a profundar nas problemáticas.

As sesións están a ter lugar no Colexio Jesuitinas Miralba. Este mesmo proxecto xa foi levado a cabo con éxito en varias cidades de España como Madrid, Barcelona, Valencia e Tarragona, e agora en Vigo, primeira cidade galega en acollelo.

O programa ten como obxectivo principal fomentar un espazo de encontro e diálogo entre os mozos participantes, e a partir de alí darlles voz e permitirlles construír as súas propias propostas fronte a problemáticas escollidas por eles mesmos.

Desde formulacións lúdicas como xogos de rol, dinámicas de expresión corporal e talleres, ata investigación, documentación e entrevistas a especialistas dos temas seleccionados, os mozos, distribuídos en equipos, terán nas súas mans a tarefa de achar solucións a problemas que lles tocan moi de preto, en moitos casos, directamente.

O venres 5 de outubro, nun evento programado ante autoridades locais e rexionais, será a ocasión na que os estudantes presenten en limpo as súas propostas, coa esperanza de que sexan tidas en conta e consigan incidir en programas e políticas públicas.

Tras moitos anos traballando a nivel internacional por promulgar un cambio no sistema educativo, Scholas detectou que os mozos, lonxe da imaxe despreocupada que se ten deles, desexan ser escoitados e ademais ter a oportunidade de participar activamente na transformación das súas comunidades.

Pola súa banda, Scholas Occurrentes é unha organización Internacional de Dereito Pontificio presente en 190 países e que a través da súa rede integra a máis de 446.000 escolas e redes educativas. A súa misión é lograr a integración de todos os alumnos do mundo a través de propostas tecnolóxicas, deportivas e artísticas que promoven a educación desde a cultura do encontro.