Pasaron xa 19 meses e Juan Carollo sigue en pé porque a pobreza aínda existe en Vigo. Mentres, reclama un novo albergue para a cidade, ao considerar insuficiente o do barrio de Torrecedeira.

Contabiliza máis de 800 persoas diferentes as que quedaron fóra do devandito albergue desde que comezou a súa loita, e iso que os políticos declararan que ninguén durme na rúa.

Só no mes de agosto, foron 201 as persoas que quedaron fóra por falta de prazas, despois de agardar na cola, sen éxito. E habería que sumar os que non se achegaron por alí pero durmiron na rúa igualmente.

Unha dura realidade que ocorre en tódalas cidades, pero á que, segundo defende Juan, deberiamos buscarlle unha solución en lugar de ocultala. A súa é unha loita sen cor político, o importante é conseguir axuda, cambiar os feitos.

No último pleno, houbo unha referencia ás dúas mortes de persoas desamparadas o día 20 de agosto, algo que non transcendeu á opinión pública, e no mesmo pleno do pasado mércores contestouse cun “iso non importa a ninguén”. 

Fronte ao Concello de Vigo, Juan continúa o seu traballo de rexistro e denuncia.