A Asemblea LGTBI de Galiza Nova e as organizacións LGTBI galegas súmanse á denuncia dunha sucesión de agresións homófobas acontecidas no municipio de Redondela.

Segundo unha denuncia anónima da vítima da agresión, un grupo de rapaces creou un perfil falso na aplicación Grindr, servizo de contacto entre homes, co fin de enganar a homes gays ou bisexuais, e despois facelos achegarse ata Redondela, proferirlles insultos homófobos e guindarlle obxectos.

“Resulta inadmisíbel que o colectivo LGTBI sigamos a ser vítimas de agresións, tanto nos espazos públicos como nos máis privados. Denunciamos ademais a gravidade do feito de que esta agresión fose premeditada, sendo preciso por parte dos perpetradores descargar e usar unha aplicación para persoas LGTBI co único fin de facer dano”, subliñan desde Galiza Nova.

“Precisamos unha lexislación firme e clara que garanta os nosos dereitos e que poña fin a calquera discriminación por mor da nosa identidade de xénero ou orientación sexual, cun réxime sancionador para os delitos de odio, e non só leis baleiras de contido, que son un xeito de ofrecer unha imaxe comprometida coa loita sen que ese compromiso sexa real”, selaron.