A comisión xudicial fixo efectivo este martes o cumprimento dunha resolución do xulgado de instrución 2 do Porriño e desafiuzou a unha veciña da parroquia de Torroso, en Mos, tras unha denuncia interposta polo seu propio pai, xa que a casa onde estaba a residir (cun fillo menor) é a vivenda familiar.

A mediados de febreiro pasado xa houbo un intento de desaloxo, pero non puido levar a termo porque un centenar de veciños da zona, en apoio desta muller, concentráronse nos arredores da vivenda e impediron o paso da Garda Civil.

Este martes, con todo, varias dotacións de axentes rodearon o domicilio e impediron o acceso de veciños e medios á zona perimetrada. Así, a media mañá, a comisión xudicial puido chegar ata a vivenda e a veciña afectada entregou as chaves.

Esta muller lamentou publicamente que o desafiuzamento é resultado dunha denuncia interposta polo seu proxenitor, que padece demencia e que, segundo a súa versión, estaría influenciado polos seus outros fillos. Así, chegou á proclamar que, en lugar de irmáns, son “corvos” e explicou que se atopa en situación de vulnerabilidade, sen emprego e cun menor ao seu cargo.