A Fiscalía pide case tres anos e medio de prisión para o apoderado dunha empresa de Vigo ao que acusa dun delito contra a Facenda Pública en grao de tentativa e un delito continuado de falsidade en documento mercantil.
Na vista, celebrada polo xulgado do Penal 2 de Vigo este martes na macrosala da nova Cidade da Xustiza (na que tanto o tribunal como as partes lamentaron a mala calidade do son polo eco), sentáronse no banco dos acusados este apoderado, ademais doutros dous acusados pola Axencia Tributaria, tamén vinculados á rede de sociedades á que pertencía a empresa onde traballaba o primeiro dos procesados.
Segundo o escrito de acusación da Fiscalía, este apoderado exercía realmente como administrador da empresa e manexa as súas contas bancarias. Así, aínda que a sociedade traballaba no sector de fornecemento de buques, o acusado “finxiu” que ampliaba o seu campo de actividade á compravenda de peixe, emitindo facturas que non se correspondían con operacións reais.
Deste xeito, emitíronse case unha vintena de facturas ao longo de 2015, por un valor total de 1,6 millóns de euros. Ao facer as declaracións do IVE, os documentos presentados pola empresa recollían o IVE soportado por esas facturas falsas, de modo que a sociedade reclamou a Facenda a devolución de case 136.000 euros.
A Fiscalía sostén que a Axencia Tributaria devolveu á empresa indebidamente só 26.289,84 euros, xa que paralizou os trámites ao detectar as irregularidades. Por todo iso, acusa ao apoderado e á sociedade de delitos tentados contra a Facenda Pública, e no caso do primeiro, tamén de falsidade documental.
Para o apoderado pide un total de 3 anos e 4 meses de prisión, ademais da prohibición de optar a subvencións ou incentivos fiscais durante dous anos e medio (mesma prohibición que reclama para a empresa). A estas penas súmase a petición dunha multa de 25.000 euros para a empresa, e multas que suman 28.240 euros para o apoderado.
Con respecto á responsabilidade civil, os dous acusados deberán indemnizar conxuntamente á Axencia Tributaria en 26.289,94 euros.
