Vigo será cidade piloto para as probas dun proxecto europeo que recolle experiencias de tráfico

Dous vehículos autónomos e conectados percorrerán a cidade e interactuarán con outros actores da vía para a recollida de datos.

O alcalde de Vigo, Abel Caballero, comparece en rolda de prensa.. CONCELLO DE VIGO

Vigo será, durante un período de 36 meses, cidade piloto para as probas do proxecto europeo IN2CCAM, iniciativa pola que o Concello de Vigo recibirá 144.313 euros.

Así o deu a coñecer este xoves en rolda de prensa o alcalde de Vigo, Abel Caballero, quen sinalou que o obxectivo do proxecto é “recoller experiencias técnicas de tráfico durante 36 meses para a análise e a posterior definición e implantación de estratexias para favorecer o tráfico fluído e seguro”.

O rexedor vigués tamén destacou que no proxecto participan un total de 22 entidades públicas e privadas de Italia, España, Alemaña, Finlandia, Bélxica, Luxemburgo, Portugal, Turquía e Grecia.

Ademais, Caballero explicou que dous vehículos autónomos e conectados percorrerán a cidade e interactuarán con outros actores da vía para a recollida de datos. “Imos estudar ben como se comporta o tráfico”, sentenciou.