Máis de 100 alumnos de Galicia e Cataluña intercambiarán coñecementos científicos en Vigo no marco do XI Foro Intercomunitario de Investigación Xuvenil impulsado polos centros educativos CPR Plurilingüe Alborada de Vigo e o Instituto Cairat de Esparreguera e organizado coa dirección técnica do Instituto Cultura, Ciencia e Tecnoloxía (ICCT) e a Unión de Cooperativas de Ensino de Traballo Asociado de Galicia ESPAZO COOP.
O encontro, que ten por obxectivo crear lazos de unión e coñecementos mutuos, desenvolverase este xoves e venres, días 24 e 25 de novembro, no Paraninfo da Escola Universitaria de Enxeñaría Industrial da Universidade de Vigo (UVigo).
Un total de oito centros educativos presentarán os traballos de investigación realizados por escolares de secundaria nas aulas e en materias optativas, compartindo as súas experiencias con todos os presentes a través de relatorios orais.
“Este foro supón un importante aliciente para os estudantes, xa que lles permite adquirir as competencias básicas fundamentais e a motivación necesaria de face orientar os seus futuros estudos”, reivindicou o preside do ICCT, José Luís Vázquez.
