InicioSociedadeO pleno de Vigo pide á Xunta un "plan de choque" para...

O pleno de Vigo pide á Xunta un “plan de choque” para reducir as listas de espera de pacientes da área sanitaria

Lamentou que moitas das máis de 12.000 persoas que na actualidade están en lista de espera para ser operadas en Vigo "non chegarán a ser operadas".

PUBLICADO O

O pleno do Concello de Vigo aprobou este mércores unha moción proposta polo grupo municipal socialista instando o presidente da Xunta, Alfonso Rueda, a reducir as listas de espera da pacientes da área sanitaria olívica.

Así, cos votos a favor de PSOE, PP e Marea de Vigo e coa abstención do BNG, o pleno solicitou ao Goberno autonómico a posta en marcha dun “plan de choque” para reducir as listas de espera sanitarias.

Neste sentido, o concelleiro socialista Carlos López Font lamentou que moitas das máis de 12.000 persoas que na actualidade están en lista de espera para ser operadas en Vigo “non chegarán a ser operadas”.

Ademais, asegurou que ditas listas de espera están a falsearse e pediu “transparencia”. Pola súa banda, os ‘populares’ apoiaron esta moción, mostrándose “absolutamente de acordo” na importancia que ten reducir as listas de espera a través dun plan de choque.

Con todo, Teresa Egerique puxo en valor que na actualidade o tempo medio de espera para primeiras consultas en Galicia é de 56 días, por baixo dos 65 días que había en 2008, cando o PSOE gobernaba na Xunta.

Tamén dixo que esta cifra, segundo datos do Ministerio de Sanidade, sitúa a Galicia por baixo da media nacional (89 días) e colócaa como a terceira comunidade con menos lista de espera, ademais de ser un dato inferior á espera que se realiza noutras comunidades onde goberna o PSOE.

Oriana Méndez, de Marea de Vigo, lamentou a existencia de máis de 12.000 pacientes en Vigo á espera de ser operados e criticou a “precariedade” e a “inestabilidade laboral” que viven os sanitarios na Comunidade, polo que moitos, segundo dixo, deciden mudarse a outros lugares a traballar.

Desde o BNG, Xabier Pérez Igrexas presentou unha emenda para que a Xunta incremente os recursos sanitarios e vaian destinados á sanidade pública e non a concertos con entidades privadas. Ao ser rexeitada, o concelleiro abstívose na votación.

APARCADOIRO DO ÁLVARO CUNQUEIRO

No pleno deste mércores tamén se trataron outros temas recorrentes da política viguesa como a situación de “abandono” das pistas municipais de atletismo de Balaídos a través dunha moción do BNG ou a petición de gratuidade do aparcadoiro do Hospital Álvaro Cunqueiro de Vigo, inaugurado xa fai máis de sete anos.

Carlos López Font tamén foi o encargado de debater esta moción do PSOE, quen lamentou as tarifas “altas e abusivas” do parking do hospital, criticando que a pesar de que baixaron, estas seguen sendo pagas con fondos públicos á concesionaria do estacionamento.

Na mesma liña falaron desde o BNG, solicitando máis transporte público para chegar ao Cunqueiro. Desde Marea de Vigo, Rubén Pérez recoñeceu que sabe que o parking nunca será gratuíto porque iso suporía que o Servizo Galego de Saúde (Sergas) tería que pagar máis á concesionaria do hospital.

Teresa Egerique, do PP, subliñou que se dependese do PSOE, de Marea de Vigo e do BNG, Vigo non tería un novo hospital e lembrou que na construción do Álvaro Cunqueiro o Concello de Vigo non puxo a disposición do Sergas nin un metro de terreo “a diferenza doutros municipios de toda España”.

ÚLTIMAS

A CIG chama ás mulleres da área de Vigo a “tomar as rúas” ao berro de ‘Stop precariedade. Traballo digno e igualdade’

A CIG presentou este luns en Vigo as mobilizacións convocadas en diferentes localidades da comarca con...

(Vídeo) Dioivo rompe o escenario no seu novo videoclip: o metal galego en todo o seu esplendor

O dúo vigués de metal en galego Dioivo acaba de lanzar un novo videoclip para o seu...

‘A Homenaxe’ achegará a música do gaiteiro Julio Vázquez Carril e o baile tradicional de Oliva López López a Vigo

O Grupo Etnográfico A Buxaina de Coruxo celebrará, o próximo sábado 23 de marzo,...

A Xunta pide ao Concello de Vigo “axilizar ao máximo” o seu informe sobre a PXOM

A Xunta de Galicia pediu ao Concello de Vigo que "emende os erros detectados"...