A factoría viguesa da compañía automobilística Stellantis parará todas as súas liñas de produción pola falta de aprovisionamentos este próximo sábado, 17 de setembro, tal como informou a compañía ao persoal.

“Por causas de forza maior, a consecuencia da falta de aprovisionamentos, o sábado 17 de setembro suspéndese a actividade nos dous sistemas“, explica Stellantis Vigo.

Ademais, a firma tamén suspendeu a quenda de noite do Sistema 1 da planta de Balaídos (que monta o Peugeot 2008, Peugeot 301 e C-Elysée), a pesar de que se manterá a actividade ese día no Sistema 2 (onde se producen as furgonetas Citroën Berlingo, Peugeot Rifter/Partner, Opel Combo, Fiat Doblò e Toyota Proace City).