A delegada territorial da Xunta de Galicia en Vigo, Marta Fernández-Tapias, lamentou as “faltas de respecto” e os “menosprezos” do alcalde, Abel Caballero, e urxiu a este e ao Concello a que presenten a documentación necesaria para o traslado da estación de autobuses ás novas instalacións de Vialia.

Así o sinalou a representante do Goberno galego na cidade despois das declaracións do rexedor este luns, nas que a criticou por facer “política barata dicindo mentiras” e por dicir “cousas incongruentes porque non sabe ben do que fala”.

Neste sentido, Marta Fernández-Tapias subliñou que non está disposta a aguantar “máis ofensas, descualificacións e menosprezos” por parte de Abel Caballero, “coas que unicamente demostra o seu crecente nerviosismo”, polo que lle pediu que “mida máis as súas declaracións públicas” e evite as “faltas de respecto”.

Ademais, a delegada da Xunta en Vigo culpou o Concello dos atrasos na apertura da estación, xa que o goberno local segue sen presentar a documentación que acredita que as obras de acceso están rematadas, para que a Xunta poida organizar o traslado.

Segundo ela, malia que Caballero indicou de palabra este luns que a estrada xa está lista para operar, falta que desde o Concello se envíe a documentación necesaria para iso, que aínda non foi facilitada á Xunta, o cal atrasa a apertura da estación.

Tamén debe ser o Concello o que comunique a autorización do Ministerio de Transporte para o seu uso, así como o plan de seguridade para os túneles. Dous condicionantes que, tal como explicou Fernández-Tapias, impiden o traslado da estación, a pesar de que a Xunta xa terminou a súa parte das obras hai máis de dous meses e pretendía abrir a estación este agosto.

“O Concello segue sen comunicar oficialmente a data de fin de obra, polo que a Xunta está coas menos atadas”, criticou Fernández-Tapias, despois de que Caballero botase a culpa ao Goberno galego dos atrasos, aínda que as obras realizadas polo Concello remataron hai unhas horas, tras sufrir atrasos.

“Se os vigueses non poden utilizar a estación é por culpa do Concello, que non trasladou a documentación acreditativa que lle corresponde”, sentenciou Fernández-Tapias.