O Bloque Nacionalista Galego (BNG) de Vigo criticou que non se retirou aínda a iluminación de Nadal dunha árbore situada na Alameda da cidade, tras varios meses desde o fin das festas.

O concelleiro nacionalista, Xabier P. Igrexas, pediu ao Concello que retire “dunha vez” os adornos colgados na centenaria araucaria da alameda e preguntou ao alcalde, Abel Caballero, se é necesario acudir ao Seprona para facer cumprir a normativa ambiental.

“É unha situación delirante que non se pode deber a unha neglixencia na xestión. Non hai un goberno tan incompetente que explique que a día 30 de maio continúen colgadas da araucaria as luces do Nadal anterior”, lamentou Igrexas.

“Ten que existir algún motivo oculto para cebarse contra un exemplar singular e catalogado nuns xardíns que están declarados como Ben de Interese Cultural e, por tanto, gozan de protección integral”, lamentou.