O Pleno do Concello de Vigo recuperou este mércores un debate que foi recorrente en determinados momentos e ámbitos políticos da cidade, pero que facía meses que non estaba presente, o da posta en marcha da área Metropolitana.
Así, os corporativos volveron a falar do ente supramunicipal, neste caso, por unha moción do grupo socialista, que pide á Xunta que cambie a lei da área para eliminar a cláusula que condiciona a súa constitución á entrada da cidade olívica no plan de transporte metropolitano, que “non existe”.
A proposta do grupo de goberno local, que foi aprobada (cos votos do PSOE, a abstención de BNG e Marea de Vigo, e o rexeitamento do PP), foi defendida por Carlos López Font, que volveu a repetir que a Xunta de Feijóo boicoteou a área Metropolitana, levándoa aos tribunais, porque “non querían que Abel Caballero fose o seu presidente”.
ABEL CABALLERO, “O ÚNICO OBSTÁCULO”
Pola súa banda, a concelleira do PP, Teresa Egerique, lembrou que o alcalde da cidade, Abel Caballero, estivo no Parlamento “aplaudindo” o día que se aprobou por unanimidade a lei da área Metropolitana de Vigo, e que asinou un convenio coa Xunta para adherirse ao sistema de transporte metropolitano, que “nunca” cumpriu. “O transporte metropolitano existe, pero Vigo non quere adherirse, e o único motivo é Abel Caballero, o único obstáculo para que haxa Área Metropolitana”, proclamou.
O portavoz de Marea de Vigo, Rubén Pérez, sinalou que a orixe do conflito do Concello co transporte metropolitano está na concesionaria de bus urbano, Vitrasa, que “fixo o posible para que non houbese Área Metropolitana” e Vigo non entrase no modelo de transporte metropolitano, porque “perdía un negocio suculento”.
Finalmente, o concelleiro do BNG, Xabier Pérez Igrexas, lamentou que nin PP nin PSOE “quixeron nunca a área Metropolitana”, senón que se dedicarona “pelexarse por ver quen presidía unha semiprovincia”. O edil nacionalista propuxo unha emenda á moción para instar un acordo entre Concello e Xunta para pór en marcha un transporte metropolitano, pero o PSOE rexeitouna.