O presidente da Xunta, Alberto Núñez Feijóo, avanzou este xoves a celebración dun concerto “importante” no marco do Xacobeo 21-22 na cidade de Vigo, aínda que evitou desvelar máis detalles, á espera de que sexa o vicepresidente primeiro e conselleiro de Turismo, Alfonso Rueda, o que o anuncie.

Así o manifestou na rolda de prensa posterior á reunión do Consello, que se celebrou en Vigo. “Gustaríanos facer concertos en Vigo, se nos deixan. Imos tentar facer concertos do Xacobeo en Vigo e ter máis sorte que coa sinalización do Camiño”, afirmou, en alusión á negativa do goberno local á instalación de sinais indicativos da Ruta Xacobea en territorio municipal.

“Hai un importante, pero eu prefiro ser cauto, prudente, mentres non o comente o vicepresidente (e conselleiro de Turismo, Alfonso Rueda), prefiro que sexa el quen traslade o nome”, engadiu. Á marxe do nome do artista ou grupo que actúe, está por concretar o lugar, xa que o Concello non parece disposto a que se fagan concertos do Xacobeo no auditorio de Castrelos. Respecto diso, no seu día, o alcalde, Abel Caballero, xa advertiu de que non quería para Vigo eventos baixo esa denominación, e convidou á Xunta a transferir o diñeiro para que fose a propia cidade a que organizase “concertos de Vigo, non concertos do Xacobeo”.

ACTUACIÓNS NO MARCO DO XACOBEO

No Consello da Xunta deste xoves presentouse informe das actuacións do Xacobeo realizadas na área de Vigo. Así, o goberno galego investiu case 8 millóns de euros na comarca en actuacións como sinalización, construción do albergue Juan Manuel López Chaves, melloras noutros albergues, programas de difusión, actividades culturais, etc.

Feijóo lamentou que a cidade olívica sexa “probablemente a única de Europa” que “prohibe” os sinais do Camiño de Santiago, e afirmou que Vigo “pode ter moito máis protagonismo no Xacobeo”.

De feito, o goberno galego autorizou a firma dun convenio por 350.000 euros coa Fundación Traslatio, para a peregrinación marítima Iacobeus Maris 2022, desde o porto de Xénova ata o de Vigo. Será a peregrinación marítima “máis longa da historia”, con 4 semanas de travesía, e con escalas en Valencia, Sevilla e O Porto, antes da súa chegada á cidade olívica, desde onde os peregrinos continuarán a pé ata Santiago de Compostela.

IMPULSO AO SECTOR TURÍSTICO

O Consello deu conta tamén das actuacións levadas a cabo na área de Vigo no último ano para apoiar a reactivación turística e axudar ao sector da hostalaría, con máis de 17 millóns de euros de dotación.

Ademais das axudas do plan de choque, o Bono Turístico, ou as subvencións para mellora de infraestruturas turísticas, a área de Vigo beneficiouse de case un millón de euros para apoiar 36 iniciativas no marco do programa O Teu Xacobeo; e máis de 6.200 locais hostaleiros recibiron en total máis de 13 millóns de euros dos plans de rescate.

Feijóo tamén lembrou o apoio da administración autonómica ao evento Vigo Seafest, organizado pola Cooperativa de Armadores, e que conta cunha achega económica da Xunta de 136.000 euros (tras a recente renovación do convenio). Tras dous anos en suspenso pola pandemia, este festival gastronómico e cultural, así como a Conferencia Internacional sobre o Futuro da Pesca, volverán á cidade en xullo.