Un grupo de traballadores do hospital Ribera Povisa de Vigo mobilizouse este xoves na porta principal do centro para reclamar a actualización do convenio colectivo, que leva 11 anos conxelado.
A protesta, que terá continuidade nunha marcha convocada para o vindeiro mércores 16 de febreiro ás 18,00 horas en Praza de España, consistiu nunha concentración nas inmediacións do hospital despois da celebración dunha asemblea na que a representación sindical trasladou aos traballadores o estado das conversas.
O comité de empresa denuncia os “escasos” avances en temas importantes que se produciron desde que comezaron as negociacións no mes de xaneiro do ano pasado, segundo a CIG.
De feito, as partes mantiveron unha reunión esta mañá para abordar cuestións relativas á xornada laboral, para o que se creou unha mesa de traballo. A dirección, segundo recolle a CIG, “insiste na necesidade de contar cunha xornada irregular e flexible”, algo que o comité rexeita.
Desde a sección sindical da CIG en Povisa lamentan os “escasos” avances desde xaneiro de 2021, polo que inciden na necesidade de forzar a introdución de melloras para contar cun convenio “digno”.
“O actual (convenio) leva conxelado 11 anos, polo que en todo este tempo os traballadores non tiveron suba de soldos. A anterior dirección, en cambio, levou a cabo despedimentos e reducións de xornada antes de vender a empresa”, engadiu a CIG.
