O portavoz municipal do BNG de Vigo, Xabier P. Igrexas, criticou este luns o proxecto do novo viario nas parroquias de Beade e Bembrive e pediu ao alcalde, Abel Caballero, que se reúna cos veciños afectados.
Nun comunicado, o BNG solicita a Caballero que escoite aos afectados polo viario PO-010, unha estrada que se proxecta no novo Plan Xeral de Ordenación Municipal (PXOM) de Vigo e que afectaría as zonas de Beade, Bembrive, Castrelos, Sárdoma e Matamá.
“Falamos dun viario de alta capacidade, cun trazado que suporía partir en gran medida unha parte importante destas parroquias e con gravísimas afectacións”, apuntou o portavoz nacionalista, que sinalou que a afectación non só sería ambiental, senón que podería supor a expropiación dalgunhas vivendas.
Igrexas acusou o goberno local de querer “impor” este viario, que pretende unir a A-55 coa avenida Clara Campoamor, “sen xustificar a súa necesidade”. Ademais, criticou as “contradiciones” do goberno local, xa que por unha banda di que é para mellorar as conexións co Hospital Álvaro Cunqueiro, e por outro asegura que trata de potenciar as vías para acceder á factoría de Stellantis en Balaídos.