A Acampada pola Vivenda de Vigo dirixiuse ao Concello e á Xunta para solicitar unha “intervención urxente” ante a situación dunha decena de persoas sen fogar que pernoctan actualmente na Alameda.

Trátase de persoas que pasan a noite nas tendas, pero o campamento comezará a ser desmontado este domingo. Estas persoas sen fogar están a recibir agora “acompañamento, apoio alimentario e protección” que, dentro das súas posibilidades, lles está a ofrecer a Acampada. “O desmantelamento da Acampada xera unha enorme preocupación polo seu futuro inmediato, xa que carecen de alternativas habitacionais e van quedar novamente expostas a unha situación de extrema vulnerabilidade e indefensión”, advertiron desde o colectivo.

Por iso, enviaron escritos dirixidos ao alcalde, Abel Caballero; á concelleira de Política Social, Yolanda Aguiar; e á delegada territorial da Xunta, Ana Ortiz. Así, lembraron que ambas as administracións teñen “responsabilidades legais” na atención ás persoas en situación de exclusión social.

Ao respecto, pediron ao Concello e á Xunta que “abandonen a súa guerra partidista” e traballen de maneira coordinada para ofrecer unha solución urxente e efectiva para estas dez persoas. Ademais, insistiron en que a situación é máis preocupante polas inclemencias meteorolóxicas desta época do ano, con choivas, frío e humidade, que “poñen seriamente en risco a saúde e a integridade das persoas que se ven obrigadas a durmir á intemperie”.

“A esa situación súmase a crecente inseguridade que padecen as persoas sen fogar, tristemente evidenciada polos graves episodios de violencia aporófoba acontecidos na cidade nos últimos meses”, engadiron. Finalmente, lembraron que a Constitución recoñece o dereito fundamental á vida e á integridade física e moral, algo que non é cuestión de confrontación política “senón dunha situación de urxencia humana que require responsabilidade institucional, coordinación e respostas inmediatas”.