A Universidade de Vigo será unha das primeiras institucións académicas a nivel mundial que utilice a realidade virtual para reducir a ansiedade e a tensión entre o seu alumnado, como socia do proxecto europeo VRxanny, financiado polo programa Erasmus+, e no que tamén participan a Universidade Politécnica e a Universidade de Lodz e a Tartu Ulikool.

O proxecto presentouse este venres en Lodz, nun acto no que participou o profesor da Escola de Enxeñaría de Telecomunicación, Íñigo Cuíñas, un dos 11 investigadores da UVigo que participan na posta en marcha e desenvolvemento desta iniciativa.

A finalidade de VRxanny é mellorar o benestar dos alumnos que padecen tensións e ansiedade, sobre todo ante os exames ou presentación de traballos, e para iso crearanse os denominados ‘lugares de descanso’ nos que os estudantes poderán relaxarse nunha contorna virtual.

Íñigo Cuíñas explicou que os espazos contarán con tres postos de actividade con realidade virtual. Cada un deses postos estará equipado con sistemas de mobilidade, imaxe e audio para que a experiencia sensorial sexa “completamente inmersiva” e permita aos estudantes abstraerse do mundo que lles rodea.

As actividades do proxecto arrincaron esta semana coa reunión de lanzamento e, a partir de agora, levará a cabo o deseño da aplicación de realidade virtual, a adquisición do equipamento para o tres postos que se crearán en cada universidade participante, as probas reais con estudantes e as diferentes actividades de difusión da iniciativa.