O alcalde de Vigo, Abel Caballero, urxiu á Xunta “resolver” a situación da atención sanitaria na área ante as “importantísimas” listas de espera para acceder a intervencións cirúrxicas e denunciou “o peche de 135 camas” durante este período estival.

Nunha rolda de prensa celebrada en Vigo este martes, afirmou que “non parece que sexa o momento de relaxar a atención sanitaria” ante as “importantísimas” listas de espera cirúrxicas, que afirmou que alcanzan as “60.000 persoas”. Por iso, incidiu na necesidade de “de dar o maior servizo” para “recuperar os atrasos que houbo por razón da pandemia”.

Así as cousas e ante unha Atención Primaria que “segue indo mal”, chamou ao presidente da Xunta, Alberto Núñez Feijóo, e o conselleiro de Sanidade, Xullo García Comesaña, a “resolver” a situación “con dilixencia”, xa que, segundo recalcou, “non hai nada tan importante” como a saúde da cidadanía.

Por outra banda, acusou ao Goberno galego de “mentir” despois de que Feijóo destacase que se consignaron 8 millóns de euros para executar un instituto no barrio vigués de Navia. Así, o rexedor asegurou que o orzamento achegado para esta edificación, que estimou que suporá un investimento de 10 millóns de euros, sitúase en 50.000 euros, polo que augurou que “a esta velocidade tardará en facerse 40 anos”. Ademais, Abel Caballero reprobou que “non houbese resposta” ao protocolo remitido á Xunta para a cesión dunha parcela municipal para acoller o instituto.