A portavoz nacional do BNG, Ana Pontón, instou ao PPdeG a “deixar de xogar coa sanidade pública” logo das denuncias de “colapso” realizadas polo persoal sanitario nos últimos días. As protestas centráronse especialmente nos servizos de urxencias dos centros hospitalarios de Vigo e A Coruña, unha situación que a líder nacionalista cualificou como a consecuencia directa de “16 anos de recortes e privatizacións” por parte do Goberno galego. Segundo Pontón, a saturación non é un feito puntual, senón que se converteu no habitual debido ao “acoso e derriba” contra o sistema público.
A líder do Bloque tamén alertou de que a Atención Primaria se atopa nunha situación crítica, criticando que o PP intente normalizar que un paciente deba agardar dúas ou tres semanas para ter unha cita co seu médico de cabeceira. Para Pontón, esta falta de recursos nos centros de saúde ten un impacto directo nos hospitais, e acusou aos populares de defender os intereses da sanidade privada en detrimento da calidade asistencial pública.
ABEL CABALLERRO APOIA AOS SANITARIOS DO ÁLVARO CUNQUEIRO
Pola súa banda, o alcalde de Vigo, Abel Caballero, quixo facer pública a súa solidariedade cos traballadores de Urxencias do Hospital Álvaro Cunqueiro. Nun audio remitido aos medios de comunicación, o rexedor criticou con dureza a situación de “saturación” e a carencia de persoal que obriga a ter “camas polos corredores”. Caballero preguntouse de xeito retórico se o hospital foi construído para este fin e lamentou que a presión asistencial sexa insoportable para os profesionais.
Para Abel Caballero, a orixe do problema radica no funcionamento dos centros de saúde. O alcalde sinalou que o longo tempo de espera para acceder ao médico de familia obriga á cidadanía a acudir a Urxencias como única alternativa. O rexedor vigués denunciou o “déficit” de facultativos tanto nos ambulatorios como no Punto de Atención Continuada (PAC), e afeou ao presidente da Xunta, Alfonso Rueda, que se dedique a “facer fotos” mentres a primeira cidade de Galicia sofre esta presión sanitaria.
