O sistema de cuadrículas con cintas para garantir a separación volverá activarse nas praias viguesa de Samil e O Vao este verán, segundo avanzou o alcalde da cidade, Abel Caballero.

Así, o rexedor explicou que ese sistema estará operativo durante os meses de xullo e agosto neses areais, do mesmo xeito que xa o estivo o verán pasado, e todo iso a pesar de que, segundo apuntou o propio Caballero, a tempada deste ano, no que a pandemia se refire, “será menos mala”.

O alcalde, que reiterou a intención municipal de garantir a seguridade “mil por mil” fronte a posibles contaxios, matizou que colocar de novo as cintas nesas praias “non significa ningunha limitación adicional á establecida pola autoridade sanitaria”, senón que permitirá distribuír homoxeneamente o número máximo de persoas permitidas.