O Porto de Vigo retirou 30 toneladas de residuos dos fondos na zona do peirao de reparacións e a dársena número 1 de Bouzas durante catro xornadas de traballo. Segundo detallou a Autoridade Portuaria, a limpeza efectuada permitiu retirar case 30 toneladas de residuos moi voluminosos e pesados, como mortos de formigón, marañas de aparellos, cables de aceiro, pneumáticos e unha gran defensa.

Tamén se recolleron estruturas metálicas, cabos, residuos de despezamento, como chapas metálicas e plásticas, restos de motores, tubos de plástico, baterías, tres botellas de gas a presión e varios sacos de pilas. Ademais, a colaboración entre o Porto e o xestor de residuos facilitou que a práctica totalidade dos residuos retirados se revalorice.

Os traballos foron especialmente laboriosos e lentos dada a gran cantidade de residuos e lodo, que dificultaron a visibilidade, e os barcos atracados, que retardaron a operativa debido á necesidade de garantir a seguridade dos mergulladores.

Esta actuación busca contribuír á rexeneración dos fondos e enmárcase na área de traballo de Biotecnoloxía Azul da estratexia de Crecemento Azul da Autoridade Portuaria de Vigo. Así, as limpezas efectuadas durante 2020 en diversas dársenas do Porto permitiron a retirada de case medio centenar de toneladas de residuos.