Axentes da Policía Nacional da Comisaría de Vigo detiveron un veciño da cidade, de 49 anos de idade, como presunto autor dun delito contra a saúde pública, por vender droga na zona da Florida.

A investigación iniciouse a finais do pasado mes de abril, despois de que a Policía tivese coñecemento da existencia dun posible ‘punto negro’ de venda de drogas nese barrio.

Os operativos de vixilancia permitiron descubrir a trasfega de supostos compradores, que acudían a un alpendre situado entre a Avenida da Florida e a rúa Tui. Alí realizaban un rápido intercambio cun home, antes de abandonar a zona.

A Policía despregou un dispositivo para deter o presunto traficante, ao que interceptaron cando se dirixía a realizar outra venda de estupefacientes. Ao cachealo, os axentes atopáronlle varias papelinas de cocaína e heroína, e outros efectos usados para o tráfico de drogas, polo que foi detido.

Unha vez trasladado a Comisaría, comprobouse que lle constan outras 29 detencións anteriores. O arrestado e as dilixencias practicadas foron postos a disposición do xulgado de instrución de garda en Vigo.