O director do Clúster Ibérico do Grupo PSA, Juan Antonio Muñoz Codina, asegurou que “de momento” non está a haber escaseza de compoñentes por mor da crise do Coronavirus e que as fábricas “están en plenísima actividade”. “Vida normal, cun pouco máis de tensión e vixilancia precisa”, resumiu.

Así o trasladou Muñoz Codina en declaracións aos medios, ante os que compareceu en París acompañado do presidente galego, Alberto Núñez Feijóo, quen se desprazou á capital francesa para reunirse co presidente do Grupo PSA, Carlos Tavares.

Preguntado respecto diso, negou que haxa escaseza de compoñentes para as fábricas. “Non está a faltar nada. Estamos a xestionar a situación e, evidentemente, hai un pouco máis de tensión que nunha vida normalizada, pero de momento non temos ningún impacto nese sentido”, remarcou.

Sobre a influencia nas vendas, respondeu que non é especialista en mercados e esgrimiu que non coñece exactamente a causa da caída rexistrada nos dous primeiros meses do ano en relación ao anterior exercicio. “Non sei se o mercado baixou como consecuencia diso ou doutras consideracións que tamén se dan no mundo do automóbil neste momento, como a electrificación”, dixo.

Nas súas fábricas, remarcou que PSA traballa con protocolos que “cumpran coa normativa legal de cada un dos países”, neste caso en España. “Pero conciliar iso cunha continuidade da actividade na medida do posible; é o que sucedeu ata o día de hoxe e é o que esperemos que suceda na semana por vir”, puntualizou.

“TODO O MUNDO SE PREGUNTA QUE PODE OCORRER”

Pola súa banda, Feijóo remitiu ás compañías para determinar o impacto industrial do Coronavirus e incidiu en que os datos dos que dispón a Xunta en relación á automoción se basean nas previsións dos primeiros meses de 2020, así como “as solicitudes de mercados que ten o Grupo en canto aos modelos que se fabrican en Vigo”.

“Todo o mundo se está preguntado que pode ocorrer desde o punto de vista industrial e ten os seus protocolos; cónstame que Citroën tamén”, resolveu.