O alcalde de Vigo, Abel Caballero, destacou que, en novembro, o tempo medio de pago do Concello situouse en 10 días, o que supuxo que a Administración local reducise o período de abono nun día respecto ao mes anterior.

No marco dunha rolda de prensa celebrada este mércores na cidade olívica, o rexedor detallou que o Consistorio realiza unha media de 17.000 pagos trimestrais por valor de 36 millóns de euros.

Mentres, contrapuxo este dato co feito de que a media de pago dos concellos españois se sitúe en “50 ou 60 días” e, a da Xunta, “en 19”. Así, puxo en valor o labor de xestión do goberno local mentres criticou que a débeda do Executivo autonómico se sitúe en “máis de 11,5 millóns de euros” a pesar de que, cando Alberto Núñez Feijóo accedeu á Presidencia, roldaba os 4 millóns de euros.

Por outra banda, Abel Caballero instou ao Goberno galego a apoiar a iluminación do Nadal da cidade, dado que, segundo datos do Consistorio, atraeu a 700.000 persoas a Vigo na ponte da Constitución. Así, resaltou que ese fin de semana acudisen á urbe olívica “máis persoas das que percorren o Camiño de Santiago cada ano”.