InicioSucesosPiden 27 anos de cárcere para o presunto asasino de Ana Enjamio,...

Piden 27 anos de cárcere para o presunto asasino de Ana Enjamio, que será xulgado a partir do xoves

Fiscalía impútalle tamén delito de acoso pola "fustrigación" ao que someteu á vítima durante meses

PUBLICADO O

A Fiscalía solicita penas que suman 27 anos de cárcere para César A.O., presunto autor do asasinato da enxeñeira Ana Enjamio, en decembro de 2016 en Vigo, e ao que tamén atribúe un suposto delito de acoso.

O procesado será xulgado, a partir do xoves, por un tribunal de xurado, na sección quinta da Audiencia de Provincial de Pontevedra, con sede na cidade olívica.

O ministerio público considera probado que o acusado, que era compañeiro de traballo da vítima e mantivera unha relación sentimental con ela durante uns meses, someteuna a unha total “fustrigación” e acoso desde a ruptura da relación, en xullo de 2016, ata que acabou coa súa vida, o 16 de decembro dese ano.

No seu escrito de acusación, sinala que César A.O. non aceptou o fin da relación e insistíalle constantemente para que volvese con el, chegando mesmo a subtraerlle o teléfono para enviar fotos de ambos á anterior parella de Ana, coa que ela retomara o contacto.

O acusado, que chegou a inscribirse no mesmo ximnasio que a vítima, instalou unha aplicación no móbil para controlar as súas chamadas e mensaxes, presentábase na súa casa, mesmo de madrugada, para reprocharlle que se vise con ese outro mozo e pedirlle que volvese ser a súa parella, e chegou a “obsesionarse completamente” con Ana.

De feito, apunta no seu escrito o Ministerio Público, César comentou aos seus achegados que rompera a súa familia para estar con ela (estaba casado e tiña dous fillos cando iniciou a relación) e que, se Ana non estaba con el, tampouco estaría co outro mozo.

O grao de acoso chegou ata tal punto que a moza deixou a súa vivenda por temor e foise a vivir temporalmente co mozo co que retomara a amizade, antes de trasladarse definitivamente a unha vivenda compartida na Avenida de Madrid.

DESENLACE FATAL

A espiral de fustrigación tivo o seu desenlace fatal na madrugada do 16 de decembro de 2016. Esa noite, ambos coincidiron nunha cea de empresa e, durante todo o tempo, César estivo pendente de Ana, chegando a seguila a ela e ao seu grupo de amigos cando saíron a dar unha volta despois da cea.

Nun momento determinado, o acusado desapareceu sen despedirse, ao darse conta de que Ana ía regresar á súa casa (no coche dunha amiga, xunto a outras persoas que a acompañaban). César desprazouse a fume de carozo ás inmediacións do piso onde vivía Ana e unha vez alí, rachou as rodas do seu coche, que estaba aparcado na zona, e esperouna, ata que a moza chegou e os seus acompañantes marcharon.

Entón, abordouna de forma sorpresiva cando entraba no portal e atacouna cun coitelo ou navalla. Sen darlle posibilidade de defenderse, arrastrouna ata o fondo do portal, onde lle asestou polo menos 28 coiteladas en abdome, peito e pescozo, das que 12 alcanzáronlle o corazón.

Despois, o acusado foise a casa dos seus pais, duchouse e cambiou de roupa, e desfíxose da arma do crime, do teléfono de Ana (que levou con el), e das roupas que vestía cando a atacou.

DELITOS E PENAS

A Fiscalía considera a César A.O. autor dun delito de asasinato con aleivosía e ensañamento (porque planeou o crime, esperouna e aumentou brutal e deliberadamente o seu sufrimento), ademais dun de acoso. Polo primeiro dos delitos pide para el 25 anos de cárcere, e dous anos polo segundo, ademais de reclamar que se lle prohiba achegarse durante 10 anos á familia da vítima, á que deberá indemnizar en 450.000 euros por danos morais.

Pola súa banda, a acusación popular, que exerce a Xunta de Galicia, pide que o acusado sexa condenado a 33 anos de prisión. Así, reclama 25 anos polo delito de asasinato, 3 anos por un delito continuado de coaccións (ou subsidiariamente 2 anos por un delito de acoso ilexítimo) e outros 5 anos de cárcere polo delito de vulneración da intimidade.

O xuízo contra César A.O. iniciarase o xoves e está previsto que dure ata o 22 de novembro. Para esta vista foi necesaria a realización dun sorteo adicional para completar a selección de candidatos a formar parte do xurado, xa que, dos primeiros 36 elixidos, non se puido garantir a presenza da vintena mínima necesaria (da que saen os 9 membros do tribunal, máis dous suplentes).

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...