O vicepresidente da Xunta de Galicia, Alfonso Rueda, subliñou que a situación do estaleiro vigués Barreras é “moi complicada”, á vez que comprometeu implicación por parte do Goberno galego “se realmente hai unha solución de futuro”.

Este mércores, en Lugo, Rueda lembrou a que o “sector naval, que pasou tempos moi complicados en toda Galicia, e especialmente na ría de Vigo, hai un tempo consolidouse e soubo reinventarse”.

En calquera caso, tras reivindicar que a Xunta “estivo aí, botando unha man (ao sector naval) moi importante nun momento decisivo”, apuntou que “agora é certo que unha empresa en concreto, Barreras, volve ter unha situación moi complicada”.

Respecto diso, sinalou que “onte –por este martes– houbo unha reunión onde participou a Xunta” e indicou que “transcendeu certo optimismo”.

Con todo, advertiu de que “a Xunta, que manexa recursos públicos de todos os galegos, segue mandando o mesmo mensaxe, está disposta a estar nunha solución pero unha solución que garanta non só o presente senón tamén o futuro de Barreras, que é tanto como dicir o futuro dunha parte importante do naval de Vigo”.

Así, apuntou que “o mesmo” que lle pide ao Goberno central é o que pretende a Xunta e que é o que quere facer “cando toque implicarse”. “Ímonos implicar se realmente hai unha solución de futuro”, resolveu.