En concreto, a sentenza, contra a que cabe recurso ante o Tribunal Superior de Xustiza de Galicia (TSXG), considera que os acordos pechados por unha empresa en relación a “unha modificación substancial das condicións de traballo fora da canle prevista legalmente” levaría incorrer nunha “fraude legal que burlaría a protección outorgada pola norma aos traballadores”.
Así, entende que os acordos realizados por PSA individualmente cos traballadores vulneran “o dereito á liberdade sindical dos sindicatos actores na súa vertente do dereito á negociación colectiva”.
Esta resolución prodúcese tras a demanda presentada polo sindicato en relación ás negociacións de PSA cos seus empregados co obxectivo de trasladar a parte deles á quenda de fin de semana por necesidades da produción.
NEGOCIACIÓNS
O Grupo PSA celebrara varias reunións co comité de empresa entre xullo e novembro de 2017 e, en decembro dese mesmo ano, ambos pactaran a voluntariedad dos traballadores como un criterio para modificar as quendas, aínda que a resolución sinala a falta dun acordo definido para suplir as vacantes que non se cubrisen deste xeito. Ademais, menciónase que se cambiaron as quendas de 12 empregados de forma unilateral.
A sentenza detalla así mesmo que os acordos realizados entre a empresa e os traballadores individualmente non serían ilegais se se negociaron cos seus representantes, situación que non se considera probada por falta de actas das reunións mantidas entre a representación dos traballadores e PSA.
VALORACIÓN SINDICAL
Nun comunicado, CUT valorou a sentenza e instou á empresa a “retornar aos traballadores afectados ás súas quendas de orixe”. Tamén chamou á negociación dos distintos sindicatos con representación no comité de empresa para dar solución ás necesidades de produción.
Así mesmo, resaltou a necesidade de reflectir nos salarios dos empregados o “incremento” dos beneficios obtidos por PSA e de “primar a voluntariedad fronte á obrigatoriedade” nas negociacións.
