Adif avisa de que os traballos na ponte metálica de Redondela (Pontevedra) obrigarán a realizar cortes alternativos da estrada N-550 entre o 18 e 22 de febreiro.
Segundo informou Adif, ten previsto iniciar durante a noite do luns 18 de febreiro a retirada da estada empregada para “os traballos de renovación, reparación e reforzo da ponte metálica ferroviario de Redondela, que se viñeron desenvolvendo durante os dous últimos anos”.
Os traballos realizaranse entre os días 18 e 22 de febreiro, en horario nocturno, de 23,00 a 6,00 horas, polo que “non afectará o servizo ferroviario de viaxeiros”, concreta Adif, pero “si obrigará a realizar cortes alternativos de carrís, con desvíos debidamente sinalizados, da estrada N-550 no tramo urbano de Redondela”.
Adif lamenta “as molestias que estas actuacións, que redundarán nunha mellora do servizo ferroviario na liña de ancho convencional Redondela-Santiago, poidan ocasionar aos usuarios” e cidadáns en xeral, ao mesmo tempo que “agradece a súa comprensión”, engade.
RENOVACIÓN
Os traballos de renovación da ponte metálica de Redondela comezaron en marzo de 2017 e prolongáronse no tempo “debido aos horarios de traballo, moi limitados, deseñados co fin de afectar na menor medida posible ao tráfico ferroviario”, explica Adif.
A obra incluíu o reforzo de elementos da estrutura metálica, como o reforzamento inferior ou a substitución de traveseiros. Ademais, actuouse sobre os arcos de aproximación, estribos e a propia vía férrea, así como sobre as bases de pilas e aparellos de apoio a última fase de traballos.
O orzamento total da intervención, “cuxo fin é garantir a continuidade da vida útil da estrutura en condicións óptimas de servizo”, destaca Adif, foi de 2.179.800 euros (sen IVE).
