O mozo vigués Nicolás G.P., de 23 anos de idade e de quen a súa familia non tiña noticias desde o pasado 22 de xaneiro, púxose en contacto finalmente este xoves coa súa nai, segundo confirmaron fontes policiais.

O mozo emprendeu unha viaxe en bicicleta desde Andalucía para percorrer, á inversa, o Camiño Portugués, en compañía do seu can. Segundo a súa familia, o mozo chamaba a casa cada 5 días pero non volveu porse en contacto con eles desde o pasado 22 de xaneiro, cando se atopaba entre Huelva e Almería.

Ante a preocupación porque lle pasase algo, a familia denunciou en Comisaría a desaparición, e a Policía alertou aos seus efectivos nesas provincias andaluzas, para que localizasen ao novo.

Finalmente, o mozo chamou á súa nai este xoves e, segundo apuntaron algunhas fontes, explicou que se despistou e que non pensaba que estivesen preocupados por el.