Un home de 38 anos, L.E.L.L., foi detido este luns ás 1,40 horas por un suposto delito de violencia de xénero contra a súa parella, unha muller de 24 anos, en Vigo.

Os feitos tiveron lugar na rúa Badaxoz cando, segundo precisou nun comunicado a Policía Local, os axentes deste corpo trasladáronse ao domicilio da parella tras ser contactados por un veciño que afirmaba que unha muller pedía auxilio.

Unha vez no edificio un home abriu a porta despois de que os axentes chamasen insistentemente. Alí, a muller, que presentaba signos de ser agredida, manifestou que pouco antes mantivera unha forte discusión coa súa parella durante a que el a atacou. Ademais, a moza, que convivía co presunto agresor, detallou que, tras escaparse del, refuxiouse nunha habitación.

Así mesmo, a presunta vítima afirmou que non era a primeira vez que estes feitos tiñan lugar e que o denunciaría. Mentres, tras recoñecer os feitos, o home foi detido.