O grupo municipal do PP no Concello de Vigo criticou este mércores que o goberno local, con Abel Caballero á cabeza, se escude nnun informe do secretario para non achegar a documentación que lle require a comisión de investigación sobre o accidente do Marisquiño, e recordou que “non é o mesmo non ter obrigación de dar esa información, que non poder dala”.
Así o manifestou en rolda de prensa a portavoz do grupo, Elena Muñoz, quen constatou que o rexedor olívico está “extremadamente nervioso” coa comisión creada no Parlamento, á que quere pór “todas as pedras posibles” para que “non se investigue que pasou” nesa noite de agosto pasado, cando parte dun “paseo” veu abaixo durante un concerto e causou máis de 460 feridos.
Nese sentido, denunciou que “o único que autorizou” a celebración dese evento nese lugar, é o mesmo que agora “pon todo do seu parte para que non se saiba a verdade”.
Con respecto á negativa do Concello de facilitar a documentación requirida pola comisión, amparándose nun informe do secretario municipal que sostén que ese órgano non ten potestade para fiscalizar a actuación da administración local, Elena Muñoz criticou que se encargue “un informe a medida” para usalo como “escusa”. “O que di é que non ten obrigación de dar a documentación, outra cousa é que non se poida dar”, sentenciou.
“Seica ten que ser obrigatorio? O normal é que se faga voluntariamente e que se dean facilidades”, apuntou a edila ‘popular’, quen confirmou que ela mesma comparecerá na comisión a próxima semana e porá “a disposición de todos os deputados do Parlamento de Galicia” os documentos que ten ao seu grupo municipal.
