O alcalde de Vigo, Abel Caballero, afeou á Xunta que non se lle solicitase opinión previa para a elaboración do borrador da nova lei de administración local: “Empeza mal”. Así o sinalou o rexedor nun audio enviado aos medios de comunicación, tras coñecerse nos últimos días que o Goberno galego someterá a información pública este novo documento.

Tras recoñecer que a actual normativa é “moi antiga” e é necesario unha nova lei de administración local, Caballero puxo o foco en que a Xunta asegurou que solicitou opinións de colectivos e representantes municipais durante os dous últimos anos pero “non pediu a opinión previa de Vigo”, a pesar de ser a cidade máis grande de Galicia por número de habitantes. “Xa significa unha posición”, insistiu. “Xa si que temos o prazo de información pública, pero se o consultaron con colectivos e distintos representantes municipais… Home, o primeiro é o alcalde de Vigo“, insistiu.