Investigadores do Centro de Investigación Mariña (CIM) da Universidade de Vigo participan no proxecto europeo DigiATLA, unha iniciativa que ten como obxectivo impulsar a transformación dixital da acuicultura atlántica, fortalecendo as súas capacidades de produción sustentable, nutrición de precisión e adopción de tecnoloxías da Industria 4.0. O proxecto abordará retos do sector, como a baixa integración dixital, as ineficiencias produtivas ou o impacto ambiental, e está liderado polo Laboratório Colaborativo para unha Aquacultura Sustentável e Intelixente de Portugal.

DigiATLA abordará retos do sector como a baixa integración dixital, as ineficiencias produtivas e ou impacto ambiental, factores que limitan a competitividade e resiliencia da acuicultura. O CIM da UVigo participa a través do grupo PhystoFish, cun orzamento de 300.000 euros, liderado polo catedrático José Luís Soengas. O centro vigués contribuirá á creación de contidos de formación centrados na análise de datos, uso de ferramentas dixitais e técnicas de acuicultura de precisión.

No marco dos ensaios piloto, os investigadores vigueses participarán en estudos coa dourada e o salmón atlántico, analizando a expresión xénica relacionada coa regulación da inxesta de alimentos. Deste xeito, poderase avaliar a resposta biolóxica dos peixes a diferentes estratexias de alimentación e condicións ambientais, xerar datos para optimizar as prácticas acuícolas e avanzar cara a unha produción máis eficiente e sustentable. Ademais, o CIM organizará sesións anuais de formación e colaborará activamente nas accións de divulgación e sensibilización do proxecto, difundindo os resultados científicos e promovendo a transformación dixital do sector.