O PP de Vigo denunciou que o Concello terá que pagar 1,1 millóns de euros a Servisar, empresa pertencente ao grupo DomusVi, en concepto de danos e prexuízos tras prestar o Servizo de Axuda no Fogar (SAF) sen cobertura contractual. A través dun comunicado, os populares criticaron o que consideran unha “nova chapuza” do goberno de Abel Caballero, apoiándose nun informe do interventor municipal que avala o pago ao recoñecer que a prestación se realizou prescindindo totalmente do procedemento administrativo legal unha vez finalizado o contrato anterior.

Segundo o concelleiro popular Fernando González Abeijón, este non é un erro puntual, senón a consecuencia dunha mala xestión que levou ao Concello a unha situación “xuridicamente insustentable”. O edil explicou que, ao non ser posible prorrogar o contrato vello e estar o novo recorrido ante o Tacgal, o servizo prestouse durante decembro mediante un “contrato verbal” ou un acto ditado fóra de calquera marco legal. Para o PP, aínda que o SAF é unha prestación esencial que non se debe paralizar, a solución debería terse buscado de maneira transparente e non mediante facturas millonarias aprobadas fóra do control democrático.

Ademais, González Abeijón denunciou que o goberno local optou por aprobar esta indemnización na Xunta de Goberno Local, en lugar de levala ao pleno municipal como establece a doutrina do Tribunal de Contas. Segundo os populares, esta manobra do Executivo de Caballero busca evitar o debate político e o control da oposición sobre un recoñecemento extraxudicial de crédito que, segundo insisten, demostra a falta de planificación nun servizo crítico para as persoas maiores e dependentes da cidade.